إمبارح إتكلمنا عن أهمية تجميع أكبر عدد من الإيميلات لإنها أنسب وسيلة (مضمونة) عشان تبني الثقة بينك وبين عميلك … انهاردة حنتكلم عن أهم الطرق اللي تقدر بها تجمع إيميلات ومعلومات عن العميل بشكل بسيط ومش مبتذل
 
عشان تزود عدد عملائك مهم جدا يكون عندك عوامل جذب أو ما يطلق عليه Lead magnet أو Lead generator
 
تعريفه بشكل بسيط هو تقديم قيمة لعميلك المثالي تكون مناسبة لإحتياجاته ومشكلته في مقابل معلومات عن العميل سواء إيميل أو رقم تليفون أو عنوان وخلافه
 
كلمة السر هنا عشان العميل يديلك الإيميل بتاعه أو معلومات عنه هو إنك تقدمله قيمة حقيقية تكون عامل (جذب) لفكره وإحتياجاته
 
وطبعا السبب من تجميع المعلومات ديه عن العميل إنك تقدر تبني الثقة بينك وبينه بشكل مستمر سواء من خلال إيميلات أو تكلمه أو تبعتله على البيت من معلومات أو اشياء تكون مفيدة له
 
ومن وجهة نظري ال Lead magnet بتاعك هو أول وسيلة تقدر بها تختار عميلك المناسب اللي تستريح في التعامل معاه لإنه لو حد مش مهتم بالموضوع مش حيديلك المعلومات الشخصية بتاعته. ولو حد مهتم وأدالك معلومات عنه يبقى ده أنسب عميل تقدر تكمل معاه الرحلة
 
طيب عوامل الجذب ديه ممكن تكون إيه؟
 
ممكن تكون كورس مجاني، كتيب، فيديو، عينة مجانية، خصم لمدة محدودة… وغيرها من طرق تقديم القيمة لعميلك