وانا صغير كنت بلعب كورة ووصلت إني أكون في منتخب مصر للناشئين وفي مرة والدي “الله يرحمه” قرر إنه يتفرج عليه وأنا بلعب في النادي بتاعي

للأسف والدي قعد مع جمهور الفريق المنافس وخلال الماتش أحرزت هدف وكسبنا المباراة

وبعد المباراة وانا مروح مع والدي قالي بهزار تعرف انك كنت السبب اني أتشتم  ومعرفش أرد – من جماهير الفريق المنافس

لو قررت تكون قائد فكر أو عمل فتأكد إنه حيتم نقدك والتشكيك فيك وفي رسالتك من ناس كتير حواليك سواء منافسيك أو حتى ناس قريبين منك وحبيت في المقال ده أقولك إزاي تتعامل مع النقد لإني شوفت ناس كتير استسلموا و مستحملوش النقد

من وجهة نظري في أكثر من نوع من المنتقدين لازم وأنت بتقرأ أو بتسمع النقد يكونوا في بالك عشان تعرف ازاي تتعامل معاهم

١- المنتقد المحب للأضواء
في مجموعة من المنتقدين مش بينتقدوك لشخصك أو لمعلوماتك ولكن بينتقدوا فقط عشان يظهروا نفسهم ويفرضوا وجهة نظر حتى لو كانت بعيدة عن الموضوع الأصلي

تعمل ايه؟
متعملش حاجة ولا تضايق خالص لأن الموضوع ملوش علاقة بيك ولا بالقيمة بتاعتك – والأفضل إنك تتجنب هذا الشخص ومتردش خالص ومتدلوش الضوء اللي بيسعى إليه

٢- المنتقد الخائف
ده المنتقد اللي ظهورك بالنسباله مضر وبيؤكد احتماليه حدوث شئ هو خايف من فعشان كدة بينتقدك عشان يحس بحاجة أسمها الأمان النفسي على أمل أحباطك واستسلامك

تعمل ايه؟
متعملش حاجة ولا تضايق خالص لأن الموضوع برده ملوش علاقة بيك ولا بالقيمة بتاعتك خالص وبالنسبالي استمرارك رغم النقد ده ممكن مع الوقت يغير وجهة نظره فيك ويتحرك بسبب استمرارك وإيمانك برسالتك

٣- المنتقد محدود المعرفة
ده المنتقد اللي معندوش معرفة كافية بالقيمة أو المنتج اللي أنت بتقدمه وبالتالي ممكن ينتقدك أو ينتقد المجال كله بسبب قلة وعيه

تعمل ايه؟
من وجهة نظري ممكن تاخد من كلامه لو مفهوش إساءة وتقدمله محتوى يزيد من وعيه عن المجال والمنتج اللي بتقدمه

٤- المنتقد اللي بيفتقد الحد الأدنى من اللباقة
دول المنتقدين اللي حقيقي ممكن عايزين يقولوا نقد بناء ولكن مش بيعرفوا يصيغوا النقد بشكل فيه قدر من الذكاء العاطفي وبالتالي بيظهر النقد بشكل غير لائق ومسيئ

تعمل ايه؟
تشكره وتحاول تصيغ السؤال بشكل أحسن وتقوله حضرتك قصدك كدة؟ … ساعتها ممكن تعرف هل هو من النوع الرابع أو من الأنواع الثلاثة الأخرى

٥- المنتقد اللي مش عميلك أصلا
المفروض أنت عارف ومحدد مين عميلك المثالي فلو جالك نقد من عميل غير عميلك المثالي المفروض متغذيش النقد ده بأي شكل من الأشكال لأنه مش مفيد ليك ولا للمنتج ولا لطبيعة الخدمة اللي بتقدمها

تعمل ايه؟
متعملش حاجة ولا تضايق نفسك خالص لأنه أساسا مش حاسس بالوجع ولا مقدر القيمة اللي بتقدمها

عشان كدة مهم جدا قبل ما تزعل من النقد تعرف نوع المنتقد عشان ده حيريحك كتير في شغلك

حاجة اخيرة
 خليك فاكر أن ده حلمك ورسالتك “أنت” محدش مجبر أنه يصدقها ولا يشلها معاك ولكن قدرتك على الاستمرار والتطور وإيمانك بفكرتك كافية تحول اي نوع من النقد والإساءة لإحترام  وتقدير

في الأخر بحب أنصح الناس اللي بشتغل معاهم بإحترام إي منافس أو ناقد لأنه المهم تكسب أنت احترامك لنفسك قبل أي متابع

ديه مجموعة مجانية من الفيديوهات اللي حتساعدك تواجه إي كلام سلبي في رحلتك
👇🏻👇🏻👇🏻

https://rb.gy/cdziy